Müğənni Şəbnəm Tovuzlu (Əsədova) lent.az-a müsahibə verib. Müsahibənin bir hissəsini təqdim edirik:

- Onunla tanışlığınız necə olub?
- Moskvada tanış olmuşuq. Yaxşı ki, tanış olmuşuq.
- Söylədiniz ki, həyat yoldaşınız sizə qadağalar qoyub. Nələri qadağa edib sizə?
- Bir çox şeyə qadağa qoyub. Xüsusi ilə də şəkillərimizin mediada yayılmasına. Ümumiyyətlə, bizim şou-biznesdə bir çox şeyləri yaxşı qarşılamırlar. Məsələn, müğənni evini, maşınını və ya həyat yoldaşını göstərir, müzakirə edirlər. Ona görə də yaxşısı budur ki, heç nə göstərməyəsən. Mənim ailəm şou aləminə maraqlı olmamalıdır. Ailəm özümə məxsusdur. 
- Həyat yoldaşınız birinci ailəsindən rəsmən boşanıb, sizinlə ailə qurub?
- Yox, onun məni tanımadan öncə də ailəsi var idi, indi də var. Yəni mən onun ikinci ailəsiyəm. Birinci ailəsindən boşanmayıb. İki uşağı da var. Mən bunu normal qarşılayıram.  Sadəcə, molla nikahında ailəliyik. Bu evlilikdən uşağımız olacaq. Bunu onun ailəsi də bilir. Münasibətlərimiz yaxşıdır. Qaynatam, qaynanam, qayınlarım, baldızım da bizə gəlib-gedirlər. Hətta onun övladları ilə də münasibətim yaxşıdır. Ümumiyyətlə, kişi odur ki, hər iki ailəsinə gözəl baxa bilir. Təki bütün kişilər mənim yoldaşım kimi dürüst və mehriban olsun. Bizə toxunanlar isə gec-tez öz cəzalarını alarlar.

- Şou-biznesdə bir çox müğənnilər doğuş anında çəkilmiş videolarını sosial şəbəkədə paylaşırlar. Siz də belə addım atardınızmı? 
- Yox, qətiyyən. Yoldaşım hacı adamdır. Elə şeyləri sevmir.
- Demək olar ki, bir çox müğənnilər ana olduqdan sonra sənətdən uzaq düşürlər. Sizdə necə olacaq? 
- Niyə görə? Həyat yoldaşım hər zaman mənə dəstəkdir. Mənə deyir ki, arxandayam, nə zaman müğənnilikdən getmək istəsən, onda da seçiminə hörmətlə yanaşacam.

- Həyat yoldaşınız geyimlərinizə qarışırmı?
- Mənim açıq-saçıq geyimlərimi görmüsünüz? Üç-dörd ilə yaxındır ki, bu adamla evliyəm, ona necə xoşdursa, elə də geyinirəm. Hər zaman onun mənə bir kəlmə sözü olur. Hacıyam, hacılığıma hörmət elə.
- Şəbnəm Tovuzlu adının son dövrlər tanınmasının əsl səbəbi nədir?
- Son dövrlər gözəl mahnılar oxudum, yəni mən qalmaqallarla yaddaşlarda qalmamışam. Efirdə mədəniyyətimlə seçilmişəm. Bütün bunlar müğənninin sevilməsi üçün əsas şərtdir.
- Əvvəlki illərə nəzərə alsaq, indiki dövrdə dəvət aldığınız toylarınızın sayı çoxalıb....
- Bəli, amma indi çox toydan imtina edirəm. Çünki indi mənə dayaq olan həyat yoldaşım var.
Artıq əvvəlki kimi ucqar rayonlarda olan toylara getmirəm. Əvvəllər ehtiyacım olduğuna görə rayon toylarına gedirdim. İndi yalnız Bakıda olan toylarda yarım saatlıq iştirak edirəm.
- Müğənnilikdən başqa, biznes qurmaq fikriniz varmı?
- Bəli, artıq bu barədə xeyli vaxt idi ki, düşünürdüm. Yaxın müddətdə gözəllik salonu açacam. Bu da mənim müğənnilikdən sonra ikinci biznesim olacaq. Həmin məkanın möhtəşəm açılış mərasimini də edəcəm.